«Алтын тұлпар» аламан бәйгесi: 10 жасар Ақжол мінген сәйгүлік оза шауып, бас жүлдені олжалады

Ақмола облысына қарасты Қабанбай батыр ауылында, Қаракерей Қабанбай батырдың кесенесi маңында өткен "Алтын тұлпар" аламан бәйгесi 100-ден астам жүйрiктiң iшiнен нағыз тұлпарды анықтады. 51 шақырымды құрайтын 4 айналымда астындағы тұлпарының күшін сақтап, бәйгенiң 3 айналымы бойы "әдейi" көзге түспей, соңғы минуттарда жүйрiгi "Шамалды" қамшылап, желдей жүйткіген Ақжол Жұматай бәйгенiң бас жүлдесін жеңіп алды. "Жасым онда. Бәйгеде қатты қорыққан жоқпын. Бұл атты бұрыннан бiлемiн, өзiмнiң досымдай", - дейдi шабандоз Ақжол.